അന്തർമ്മുഖനായ അർജ്ജുനൻ

കുരുപാണ്ഡവ യുദ്ധഭൂവിലു-

ള്ളൊരു കൂടാരമതിങ്കലേകനായ്

മരുവീ പുരുഹൂതനന്ദനൻ

പുരുചിന്താവശഗൻ നിശാന്തരേ

തിരി താഴ്തിയ ദീപരാജി, ശ-

ർവ്വർ, താരേശസമാഗമോൻസുക

സ്ഫുരിതാരസി ചേർത്ത ഹാരമായ്

പരിശോഭിച്ചിതു, പാതിരക്കു മേൽ

ഭടനഞ്ചയമേറെ വീറൊടും

അടരാടി ക്ലമമാർന്നു മേനിയെ

സ്ഫുടരാഗമിയന്ന നിദ്രപുൽ-

കിടവേ മോഹിതരായ് ശയിച്ചിതു (തേ)

അലറും ജലരാശിയെന്നപോ-

ലല തല്ലുന്ന വികാരവായ്പിനാൽ

നിലവി, ട്ടഴലാലുലഞ്ഞു, ഭൂ-

വലജിത്തിൻ മനമന്നു മേൽകുമേൽ

കുരുവംശഹിമാംശു ഭീഷ്മനോ-

ടുരു ലോഭത്തിനധീനനായ താൻ

കരുണാലവമെന്നി, നിന്ദ്യമാ-

മൊരു കർമ്മം ഹഹ! ചെയ്തുസംഗരേ

വിജയാപജയങ്ങളാജിയിൽ

നിജഭാഗ്യാനുസൃതം വരു നൃണാം

സുജനങ്ങൾ ജയം കൊതിച്ചു, ബാ-

ഹുജധർമ്മത്തെ വെടിഞ്ഞിടാ ദൃഢം.

ജനകൻ മ്രൂതനായതും പുരാ

രണഭൂ വിട്ടു മടങ്ങിവന്നതും

ജനമന്നെതിരായിരുന്നതും

മനതാരിൽ സ്ഫുടമോർത്തു ഫൽഗുനൻ

ധരയെജ്ജനകൻ വെടിഞ്ഞന-

ന്തരമന്യർക്കു പറന്ന നന്ദനർ

ദുരപൂണ്ടു പുരത്തിലെത്തിയെ-

ന്നുരചെയ്താർ പല പൗരമുഖ്യരും

അവരെഗ്ഗണിയാതെ ഭീഷ്മനാ-

ണിവരും പൗരവരെന്നുരച്ചതും

യുവരാജപദത്തിനഗ്രജ-

നവകാശം തരകാമാക്കിവച്ചതും

സുതരെന്ന കണക്കു തങ്ങളിൽ

സതതം പ്രേമരസം ചൊരിന്ന്ജിവൻ

ക്ഷതമെന്നിയെ കാത്തു ധൂർത്തരാൽ

കൃതമായുള്ള വിപത്തിൽ നിന്നുമേ

ദ്രുപദാത്മജതന്നെ വേട്ടു നി-

സ്ത്രപമപ്പെൺ വഴി വാണതങ്ങളെ

കൃപയാ പുരി പൂകുവാൻ ക്ഷണി-

ച്ചപകർഷത്തെയൊഴിചതീ മഹാൻ

സ്മ്മൃതിയിൽ തെളിവായുയർന്നു പാ-

ർഷതിയെപ്പൂർവ്വജനക്ഷ ലീലയിൽ

മതി മോഹമിയന്നു വാതുവെ-

ച്ചതിനാൽ വന്നൊരു മാനഭംഗവും

ഹഹ! മാം പരിപാഹിയെന്നു, ദു-

സ്സഹശോകത്തൊടനാഥപോലവൾ

സഹസാ വിലപിക്കിലും, പിതാ-

മഹനൊന്നും പറയാതിരുന്നതും

നൃവരാംഗന, പൗത്രജായ, യാ-

ർത്തവമാലിന്യമിയന്ന മാനിനി

യുവസുന്ദരി, യസ്സഭാന്തരേ

അവമാനം പലതേറ്റുവെങ്കിലും

പല മട്ടവൾ വീണു കേണലം

വിലപിച്ചൂ സവിധത്തിലെങ്കിലും

ഖലരാടയഴിച്ചെറിഞ്ഞിടും

നിലയിൽത്തന്വി തപിച്ചുവെങ്കിലും

അരുതെന്നൊരു വാക്കുപോലുമി-

ക്കുരുവൃദ്ധൻ പറയാഞ്ഞതെന്തഹോ!

അരുതാത്തതു ചെയ്വതെന്നപോ-

ലൊരു തെരല്ലിയതീക്ഷ ചെയ്വതും

സരിദർഭകനെപ്പഴിപ്പതും

ശരിയല്ലാ നിരുപിച്ചു പാർക്കുകിൽ

പരിരക്ഷയവൾക്കു നൽകിടാ-

തരികേ നിന്നിതു കാന്തരഞ്ചുപേർ

ശമനാത്മനജഗ്നിസാക്ഷിയായ്

സമയം ചെയ്തതു തെറ്റിയല്ലയോ

വിമതർക്കു വലയ്കു വിറ്റ, തു-

ത്തമയാം തന്നുടെ ധർമ്മപത്നിയെ?

ഒരു ദാസിയെ യെന്തുചെയ്യുവാ-

നരുതാത്തൂ യജമാനനിച്ഛപോൽ

കുരുവൃദ്ധനു നീതിയോ കട-

ന്നരുതെന്നോതുവതെന്നുമോർക്കണം

പലരക്ഷ വിനോദലോലരു-

ണ്ടുലകിൽ, കൈയ്ക്കു പിടിച്ച കാന്തയെ

വിലപേശിയ ധൂർത്തനാരു, നി-

സ്തുലനാം തന്നുടെ ജ്യേഷ്ഠനെന്നിയേ?

ഒരു സത്യവചസ്സു വിസ്മരി-

ച്ചൊരു കർമ്മം നൃപനാചരിക്കവേ

അരുതെന്നു തടുത്തിടാതതി-

ന്നരു നിന്നോരിവർ നീതി നിഷ്ഠരോ?

പറയാമതു സത്യനിഷ്ഠയാം

മറയാൽ മൂടിയപേടിയെന്നുമേ

മുറതെറ്റിയനന്തരം പലേ-

മുറയും തങ്ങൾ നടന്നതില്ലയോ?

വിജയാർത്ഥനട ചെയ്തപോതു ധ-

ർമ്മജനോടോതിയിദം പിതാമഹൻ

"വിജയൻ സമരേ ശിഖണ്ഡിയെ-

നിജരക്ഷയ്കു വരിച്ചുവെന്നിടാം"

അതു ധർമ്മജ ധർമ്മനിഷ്ടയ-

ച്ചതുരൻ ശോധന ചെയ്തതായിടാം

അതു കേട്ടിവർ നിന്ദ്യവൃത്തിപൂ-

ണ്ടതു ധർമ്മിഷ്ഠർ പഴിക്കയില്ലയോ

ഗുരുവുണ്ടിനിയാർക്കുമേ ജയി-

ക്കരുതാ വീരനെ ധർമ്മ സംഗരേ

ഒരുവേള വധിച്ചിടേണ്ടതായ്

വരുമോ ഹാ! ദ്വിജനേയുമേ ഛലാൽ

സരിദാത്മജനോടിടിഅഞ്ഞൊഴി-

ഞ്ഞരിവംശാന്തക നംശഭൂവരൻ (നായ സൂതജൻ)

ദരിയിൽ ക്ഷുധപൂണ്ടുലാത്തിടും

ഹരിയെപ്പോൽ മരുവുന്നു വീര്യവാൻ

അവനോടടരിങ്കൽ നേരിടാൻ

ഭുവനം മൂന്നിലുമില്ലൊരുത്തനും

ഭവശിഷ്യ സുശിക്ഷിതന്നൊരു-

ൽസവമാണെത്ര കടുത്തയുദ്ധവും

ശരമെയ്വതിലുള്ള ലാഘവം

വര ദിവ്യായുധമന്ത്രസിദ്ധിയും

കരവേഗവുമൊത്തൊരംഗ ഭൂ-

വരയുദ്ധം കലയാണു കാണുവാൻ

വഴിയെന്തവനോടെതിർക്കുവാൻ

കഴിവില്ലായതിനസ്ത്രശക്തിയാൽ

പഴി പണ്ടുമുതൽകിവങ്കലു-

ണ്ടൊഴിയില്ലാ ജയമെന്നി ദുർജ്ജയൻ

മതി ചിന്തകളച്യുതൻ പദം

പ്രതിയെന്മാനസമേ! ചരിയ്കുക

മതിമോഹമകറ്റി നിത്യമാം

ഗതിയേകീടുമനാഥരക്ഷകൻ

ഒരു ശുഷ്കദലം ചലിപ്പതും

നിരുപിച്ചീടുകിലീശ്വരേച്ഛയാൽ

കരുതിന്നിതു മോഹ വായ്പിനാ-

ലൊരുവൻ ഞാനിതു ചെയ്തുവെന്നിദം"

പരപൂരുഷനുള്ളിലുള്ളൊര-

പ്പരമോദ്ദേശമറിഞ്ഞതാരുവാൻ?

ഒരു കൃത്യവുമില്ലിവന്നു, ത-

ച്ചരണേ മാനസമന്വയിക്കയാൽ